قصاصة-155

وكتبت قصتا بالدموع..

شالها القدر..

سنتين...تلاتة...و أربعة...

والعد بيزيد..

بسمات, نحن بنعتذر..

بسمات

يئسنا من الرجوع..

وسألت كيف الزول يضيع؟

جاني الجواب

ما قالوا لينا الذيب بخطف العنزة

لو بعدت شوية من القطيع

مسخت خلاص سيرة الفرن و رغيفو

يالشلت البنات..حزنا عليك خريفو

خلّفت الوجع..ودمعنا ماشي زريفو

في يوم الحساب

بنشوف عليك تصريفو..

في أبقوتة عيشتي وضوقوكي المرّة

مرقوك من قرايتك..بس قولي بت الضرة

ما عرفوا المقام..دي عزيزة إنتي وحرة

وديل أهلك عزاز..إلّا القدر إتجلّى..

لي ناس القروش غسلتي انتي كويتي

ست الشاي لقت أخلاق وصدقا فيكي

جينات الأدب أمك وابوك أدوكي

دعوات والديك طول السنين حفظوكي..

يوم جاك العريس وافقت بيهو طوالي

زول السترة جا ياناس ألملم حالي

نمشي المحكمة..والقاضي يبقى الوالي

مقطوعة الأصل...وخلاص أروّق بالي..

أحمر موقي كانت ليك دربا أخضر

شجر العايلة زي نادى الفريع الأنضر

وانكسر الفراق بي جيتك واتسطر

ليك عمرا جديد وسط الأهل إتسطر..

وربنا يجمع البنت التانية يا رب

هنادي الهادي 18 ديسمبر 2016

قصاصة-154

ستكف سارا عن مناداتي ب (بت) و ستناديني كما الآخرين...

هنيئاً لنا سارا..

قصاص-153

قصاصة-152

بدأت القصة عندما طلبت مني ولاء أن أكتب لها قصيدة أمدح وأتغزل فيها بفارس أحلامها ذو الحصان الأصفر, ففكرت ملياً ثم كتبت لها:

يازولة هوي أختيني تب

آخر زمن ...شفع يقولو الريد وجب..

الريدة ما لعبة عيال

خليكي في ورق الحلاوات والملاح الفي العلب...

شوفن قرايتكن أخير,

شيليهو برة من القلب..

أنا غايتو مابكتب عديييييل

حقيقة..لا غش لا كضب..

فأظهرت قدراتها التي كانت تخفيها لتهاجمني قائلة:

وريني ياخ أقول شنو..........؟

بس للأسف ماجيت أعاتبك في الكلام

أنا بس بدافع عن غرام

الحب دة ما بس بالكلام

الحب تبادل إحترام

الحب بعلم إلتزام

الحب ما بس كلمتين

ولا مكالمة في كل حين

الحب إحساس بالحنين

واثباتو تلبيس دبلتين

والباقي إكمال نصف دين

مالحب دة ما بس للكبار

ما أصلو ماكان إختيار

ولا عمرو يوم بقى لي قرار

الحب دة إحساس في القلب

والحب دة ما ظنيت لعب

بالجد هو إحساس في القلب

والله إحساس في القلب

يا زولة  خليهو الكلام

يا زولة أختيهو الملام

وكمان دة سيبيهو الكضب

ياخ زولي لو قات امدحو

في مدحو بغلبني الكتب

أنا زولي بكتب فيو

برااااااااااااااااااااااي

وانا زولي بوصفو ياخ

براااااااااااااااااااااااي

زولي المحكر في الفؤاد

رغم المسافات البعاد

ما أصلو أكبر من كتابات الورق

ومضة عيونو يشوفها زول

يحلف يقول والله برق

و بريق سنونو المن بعيد

يسرق منامك ياخ سرق

والله بخاف أوصف كتير

في لحظة مني بيتسرق...

صعقت من الدهشة...ثم غرقت في الضحك ...وقلت لها:

وريني ياخي أقول شنو...

والله غالبني الضحك...

عيون برق !

وسنون سرق !

وقلب حرق !

أسترنا يا رب الخلق...

الريدة ما تبهدلنا يوم...و ارواحنا تطلع للمناخير والحلق...

غرام وإحساس واهتمام!!!

غرقانة في زولك غرق..

قلبك من الحب إتشرق...

عقلك خلاص ياحليلو مات

علق رقيبتو و إنشنق..

حتى الحروف ما بتوصفو..؟؟؟؟؟؟!!!!!!!!

لتّق هنا و أربط هناك

لمّي العناقريب باللغات

واملي الورق...

لا شفتو يوم لا عرفت في يوم خلقتو

أنسيني منو ومن مواضيع حبكم

 خليني أمرق وانزلق...

لو دايرة مني كلام عشق أمشي الغرب

أنا غايتو بيعجبني الشرق..!

فردت:

أنا ياخ بريدو

والله بريدو

وانا ساكنة شريانو ووريدو

ما أصلو قلبي انا فيو حرق

وانا عارفة مقتولة عشق

خلونا يا هوي ياخلق

وانا ياخ راضية البهدلة

خليهو يقعد في الحلق

وانا  بيهو أروى وأتشرق

ما قلبي ميت من زماااااان

واحساسي فات حد الغرق

معليش وعذرا وآسفة

بس زولي ما زيك كدة

وانا زولي ما زي خلقتك

ما أصلو ماهو البيشبهك

لو ما بخاف ربي الملك

شوية بس ويكون ملك

يا ربي احفظو لي برااااااي

احميهو من عين الحسود

يا ربي تحفظو تحرسو.

فقلت لها:

يا زولة هوي استغفري...

الزول بجيب خبرك عديييييل

يومو اليفوتك ويفتري...

والله ما تتغزلي

لو كان ملاك,

ما كان تشرفو عرفتك

كان بدري شتت

وقال بري

يا ناس بري..

يا ناس بري...

واكتفت بأن تقول لي:

يا شاعرة !

وكان الرد:

أنا شاعرة والله العظيم

لكن قصايدي بتختلف..

أنا ما بدور القافية بي نفس النهايات والحرف..

حتى البيوت دايراها تشتيت 

لا أراضي ولا سقف..

أكتب حرف

وأفط حرف..

أكتب وأتلولو وفي نص السطور أقعد ألف..

ما شفت باقيك يا ألف..

الهمزة فوووق والشخطة بي جاي بي طرف..

و النون دي نقطتا بي هنااااك 

والسين مدنقرة لي تحت 

والعين ترف...

شربيك عجيب مابتوصف..

خلوني أكتب بي نفس

لا تقيدوني ولا قرف..

و بعدها فضلت الصمت عن مسايرتي ولكنني لم أتركها في حالها فكتبت لها:

ماقلتي شي؟؟؟!!!!

وسكتّي زي السمحة وكتين تختشي...

ارمينا ياخ بي كلمة ألهبي شعورنا وتشتشي...

الدنيا من بعدك فراغ

والكلمة ما بتعرف مشي..

ولا زالت القصة لم تنتهي.

قصاصة-151

.......

فابتسم ,

و قل لربك شكراً...!

قصاصة-150

نعم رحلت....

و عندما يسألوني لن أجيب,

لن أستطيع أن أصارحهم بأنه لم يعجبني ويؤلمني أن أرى المراهقين يعبرون عن حبهم

بهذه الوقاحة.

قصاصة-149

أنا شاعرة والله العظيم لكن قصايدي بتختلف...

أنا ما بدور القافية بي نفس النهايات والحرف....

حتى البيوت دايراها تشتيت لا أراضي و لا سقف...

أكتب حرف

وأفط

حرف

أكتب و أتلولو و في نص الحروف أقعد ألف...

ما شفت باقيك يا ألف...؟؟؟

الهمزة فووووق والشخطة بي جاي بي طرف..!

والنون دي نقطتا بي هناك..,

والسين مدنقرة لي تحت,

والعين ترف :-)

شربيك عجيب ما بتوصف..,

خلوني أكتب بي نفس..

لا تقيدوني ولا قرف...!!!!!؟؟؟

قصاصة-148

كلما اضطررت الى المشي في مياه الأمطار المختلطة بالقاذورات,

تقززت من قدماي...,

وبصقت على الوطن...!

قصاصة-147

وجعي عليكِ

فقلت مهلا, لا وجع...

قد ضاق صدركِ

قلت لا, لا زال صدري متسع...

من كان يوسف-كم فليس بيوسفي

أنا يوسفي قد مات مختنقا فلم يأكله ذئب مثلما زعموا

ولم يلقاه ضبع..

لم يأت واردهم ليدلي دلوه, لم ينقذوه..

ولم تراوده التي في بيتها عن نفسه,

ما زار سجنا ما رأى برهان ربّ أو سمِع...

قد مات يوسف يوم أن غدروا به

نهبوا بضاعته بلا ثمن,

ومات بغصة..

فبكيت يوسف لحظة ونسيت أن 

الظلم ظلمات لمن زرع الوجع...!

قصاصة-146

ما بين الدفع والتقهقر,

تتولد الرغبات المتهالكة..!

قصاصة-145

لا تهمني رداءة الكلمات

سأكتب فقط لأكون بخير..

قصاصة-143

كل يوم هو بداية لإشراق عام..,

فكل عام وبداخلنا نبضان:

نبض للسعادة,

وآخر للأحزان...!

قصاصة-142

أحقاً كتبت بصمت!

فبالله قل لي كيف يبوح اليراع بدون بكاء,

نواح ,

بغير دموع؟!!!

قصاصة-141

في كل عيد

ترسل أمي دمعاتها...

لأن أبخرة الفقد تتصاعد

تملأ الوجود حينها..

يعبق الفرح برائحته

ويشوش صورته...

لسان حاله يقول:

السعادة لا تكتمل الا بي..

قصاصة-140

اكاد اشك في انوثتي عندما تربكنني الجميلات..

قصاصة-139

بعض الصفحات ملأى,

وبعض الصور غنية عن التعبير..

قصاصة-138

رمضان بالصبر وطاعة المولى أجمل.

رزقنا الله صوم بلا شكوى.

قصاصة-137

البراءة لمسة بملامح الأطفال لا تُقاوَم.

قصاصة-136

مهما كبرت...

سيظل حضن أمك أكبر...!

قصاصة-135

لا توجعوني...

لا تسألوني كم من الأعوام أطفأها عمري..!

قصاصة-134

في قلب المستقبل....,

سألقي بما صنعت من أمنيات...,

وأنظر نحو الأفق..., 

و أنتظر..

قصاصة-133

صامدة, 

كالوجع في قلب البؤساء..

قصاصة-132

سيشرب..,

ويشرب....,

ويشرب.....,

ويزداد قحطا ....ويشرب....

ولن يرتوي غير بالإعتذار.

قصاصة-131

قولي وداعا...ولكن..,

قوليها بإيقاع اللقاء..

قوليها..كأهلا....كمرحبا...

كسعدت بلقائك...

كشكرا لإتاحة الفرصة لي برؤيتك...

قوليها بلا حزن....وابتسمي

و إياك....إياك أن تدمعي..

فهذا وداع استثنائي..

وداع فريد..

وداع بهاره الإنكار!